Mipite i kiman taktak na uh maw?
Manipur Assembly in singtangmite gam leh gua banah, India khua leh tui hilou chihna Doisekongkang Bill 3 ziakin Manipur hills district 5te, a biktak in Churachandpur district ah kiphinna tuni toh sim in ni 21 ving veng a phata. Sum neite’n zingkal dak 5-1pm tan in a poimoh van lei theihna ding hun a neih uh, himahleh hiai dakkal sung in migentheite’n poimoh leina ding sum a zong man kei uhi. Bazar kihong mahleh a leina ding a nei tuan kei uhi. Hiai chu a nepte; salpha 9te luang daidide in a lum ua, kam khat chiat bek hong paukhe thei hile uh bang a gen ding ua ‘kituaktak in i tup uh a tangtun masiah hong pang un aw, beh leh phung, pau leh ham, nam leh nam ziakin na pankhawmna uh hon subuai kei un aw’ a chi ding un ka gingta hi. Nekzong manloute’n leng maban lametna toh theihsiam/dohsiam hamham poimoh ding hi.
I theihsa uh ahi, legal point of view chihchih leng a ngai nawn kei, a hoihlou chih i thei chiata uh. Hoihlou chu hoihlou himai! A ut uh leh zukkik uh hen, a ut uh leh hiai sang a khauhzaw leng behlap uh hen, i pan chiat nak ua Act a zat hun ma in i uninou-aknoute nasan toh i pawtkheta ding uhi. Kumteng in Manipur gamgi India in a khen kei ding, khenkhiak ding om tengteng Indo-Nago peace talk a final hun un ahihvek ding ua, huai nung chiang in Manipur Chapter Closed a chita ding uhi. Foreigner a hon chih uh lehleng poilou, Ok, Israel te’n Pharo kiang ah, ka gantate uh leh ka neih ka lamte uh toh ka pai ding uh a chih bang un, foreigner ka hih uhleh ka uninou-aknoute uh tel in, ka inn uh leh ka loute uh banah, ka gam uh toh ka paikhe ding uh chih ding himailou hia?
Kum bangzah hiam paita in Nagate’n kha 2 sung vingveng Dimapur line leh Jiri line a bandh lai un Senapati in Nagaland apan a poimoh a lalut ua, Ukhurl leng Nagaland toh ki-gamgi ahihman un a buai kei ua, Tamenglong leng, Assam toh kigamgi ahihman un a buai kei ua, Chandel leng Moreh leh Ukhrul tungtawn in hinna ding lampi a nei ua, buai thousam mahle uh ei toh teh in a buai kei uhi.
Hiai hun lai in Guite Road poimoh dan a theikhia ua, kintak in Works Minister K. Ranjit makaihna in Guite Road bawl ding in a hong kisa ua, JCB bangzah hiam leng a tawllut man ua, himahleh bandh a hong kihon man ziakin ngaihsak ahinawn kei hi. Jiri road kia a buaipih charchar uhi.
Singtangmite a ding gamgi a kikhen khiak mateng tawp sawm nawn lou ding in i kikoih ua, bill passed dia nohtute leh a passed-te’n leng tawp a sawm tuan kei hial ding uh. Huchi leh bangchi ding, kinawktuahna/bandh huaise deuh mailam hun ah i tuak thei gige i hi uh chih ngaihtuah a neih a poimoh diam? Huai a ding a lampi omsun tuh Mizoram toh kikawmtuahna kintak a puahphat ahi. Huai ding in Mizoram toh kikawmtuahna naipen tuh Guite Road ahi. CCpur district mipite poimoh teng laklutna di’n Guite Road a muanhuai hia? Muanhuai lou.
Manipur Govt toh kisai thei nawnlou i hihman un, i muan mahmah, JAC te’n hiai lam puahphat ding dan si-leh-liamte, zin-leh-lengte leh local buaina neuhneuh genseng louh omte a buaipih kawmkawm un lungsim in hon neile uh a deihhuai mahmah hi. MLA te kitawp khitnung constitution dungzui in kha 6 sung in election ECI in a hon sai ding a, huai hun chiang in ‘Separate Administration’ ngetna in JAC makaih in ‘Hills district’ teng in ‘boycott’ vek le, Pu Modi sin leh lung a vit mahmah ding hi.
Hiai tan tun nang in mimal chih khosakna a hon sawkkha ding a, siamsinna tengteng a hon sawkkha ding a, saptuamte nasepna naktak in a hon sawkkha ding a, Manipur Govt nuai a semtute a hon sawkkha ding a, phatuamngai pawlpi teng hon sawkkha ding ahihman in huai ding in mipite i kiman taktak na ding uh maw?
Tuabangkal ah, i lak ua Unity hoihtak omlai i mansak ua leh ‘Tengkol pangsual tuitaw a tung’ chih upate’n thupil a, a neih uh i tung ding ua, hun paisa teng sang inleng nelhsiah leh simmoh i hita ding uhi.
Lamka Post Editorial Sept 21, 201
